२०७९ माघ १७       About us    Advertise    Nepali Unicode    Preeti to Unicode               

झापा, २२ पुस । वैदेशिक रोगजारबाट फर्किएका बिर्तामोड नगरपालिकाका लोकबहादुर दाहाल, तोयानाथ ढुङ्गाना, अनिल गौतम र भद्रपुरका काशीराज गुरुङ मिलेर फोरस्टार क्लिनिङ सर्भिस कम्पनी नै खोलेर सरसफाइको काम गर्न थालेका छन् । उनीहरु आफू मात्र गर्दैनन् अन्य आठ जना युवालाई रोजगारी दिएका छन् । ती युवासँग खाडीमुलुक कतार र दुवईमा २० वर्ष क्लिनरको काम गरेर बिताएको अनुभव छ । परम्परागत शैलीलाई उछिन्दै अहिले आधुनिक शैली हाबी हुँदै गएको छ ।

विदेशमा आफूले जानेको सीपलाई आफ्नै देशमा प्रयोग गर्ने र युवा जमातलाई समेत काम सिकाएर दक्ष बनाइ स्वरोजगार बनाउने उनीहरुको उद्देश्य छ । प्रायः सरसफाइको काम गर्न नपढेका भए पनि हुने र सामान्य झाडु लगाउन जान्ने भए पुग्ने मान्यता छ । तर उनीहरुको धारणा फरक छ । हिजो माटो र काठले बनेका घर हुन्थ्थें । आज नेपालमा पनि आधुनिक टायल्स र मार्बल लगाएर बनेका घर छन् । सरसफाइमा ध्यान दिन सकिएन भने बेलैमा खुइलिने र भत्किएर जाने उनीहरुको भनाइ छ ।

“सरसफाइ मानव स्वाथ्यका लागि अपरिहार्य छ, हामी आधुनिक तरिकाले राम्रो र गुणस्तरीय केमिकलद्वारा सफा गछौं । जसले घर, परिवार र समाजलाई सुरक्षित बनाउँछ,” सञ्चालकमध्येकै अनिल गौतमले भने,  “शुरुमा कम्पनी शुरु गर्ने बित्तिकै आफन्त र नातागोताले सरसफाइको काम नगर्न सुझाएका थिएँ । तर, आफूहरुले जानेकै काम गरेर समाजमा स्थापित हुने र व्यावसायिक बन्ने प्रणका साथ लागिपरेका हाैं ।”

त्यसो त शुरुमा उनहरुलाई कम्पनी दर्ता गर्न सकस परेको थियो । आन्तरिक राजश्व कार्यालय र जिल्ला प्रशासन कार्यालयका कर्मचारीले सरसफाइ गर्ने पनि कम्पनी हुन्छ र ? भन्दै प्रतिप्रश्न गरेका थिए । जिल्लामै पहिलो पटक कम्पनी नै दर्ता गरेर सरसफाइको काम गर्ने उनीहरु नै पहिलो हो । कम्पनी दर्ता गरेर यो कार्यमा उनीहरुले आज सफल बनेका छन् ।

“विदेशमा अन्य कामभन्दा महत्वपूर्ण सरसफाइ हुन्छ । यस्तो काम तालीम प्राप्त र दक्षजनशक्तिले मात्र पाउँछन्”, उनले भन्नुभयो, “विडम्बना नेपालमा सरसफाइलाई सामान्य ठानिन्छ । आधुनिक प्रविधि र दक्षजनशक्तिद्वारा काम गराउने थोरै छन् ।”

उनीहरुले मुनाफा कमाउनुभन्दा पनि सरसफाइको महत्व दर्शाउन र अरु पेशा जस्तै यो पनि सम्मानित पेशा हो भनेर पहिचान बनाउन आफू लागि परेको बताए । “हामीले विदेशमा जे सिक्यौं र गर्यौं त्यही काम आफ्नै ठाउँमा गर्ने प्रण गरेर विदेशबाट फर्कियौं”, काशीराज गुरुङले भने,  “तर हाम्रोमा सरसफाइ गर्नेलाई सम्मानित पेशा ठानिदैन, हामीलाई यसैको महत्व समाजमा बुझाउन र प्रशस्त आम्दानीको स्रोत हुन्छ भनेर युवालाई अभिप्रेरित गर्नुछ । कम्मर कसेर लागेका छौं ।”

यतिबेला दैनिक विभिन्न सङ्घसंस्था, व्यक्ति र सरकारी कार्यालयका भवन सफा गर्न उनीहरुलाई भ्याइनभ्याइ छ । सहारा नेपाल, नेपाल बहुउद्देश्यीय सहकारी, आन्तरिक राजश्व कार्यालय भद्रपुरलगायत दर्जनौं कार्यालयमा उनीहरुले सरसफाइ गरिसकेका छन् । आन्तरिक राजश्व कार्यालय भद्रपुरका प्रमुख युवराज श्रेष्ठले उनीहरुको कामबाट आफू सन्तुष्ट भएको बताउनुभयो । एक वर्ष अघि सरुवा भएर यस कार्यालयमा आएदेखि नै उहाँले व्यावसायिक सरसफाइ गर्ने कम्पनी खोजी गर्दा बल्ल उनीहरुसँग सम्पर्क भएको बताए । यतिबेला उनीहरुको कम्पनीमा तालिम लिनका लागि आउनेको पनि भीड लाग्न थालेको छ । तालिम लिन आउनेमा वैदेशिक रोजगारीमा जाने बढी छन् ।

प्रतिक्रिया

सम्बन्धित खवर

error: Content is protected !!