२०७८ श्रावण १६       About us    Advertise    Nepali Unicode    Preeti to Unicode               

नेपाली कांग्रेस प्रदेश १ संसदीय दलका प्रमुख सचेतक केदार कार्कीले प्रदेश सरकारका मन्त्रीहरू नै कमिसनको सेटिङमा लिप्त हुँदा सरकारका सरकारप्रतिको विश्वास क्षिण हुँदै गएको आरोप लगाएका छन् ।

आइतबार नेपाल प्रेस युनियन ओखलढुंगाले आयोजना गरेको पत्रकार सम्मेलनमा कार्कीले प्रदेश सरकार तस्करहरुको घेराबन्दीबाट बाहिर निस्कनै नसकेको आरोप लगाएका हुन् ।

उनले भने, “घेराबन्दीमा भित्ररहेर विकास निर्माण, कोभिड नियन्त्रण स्वास्थ्य सामग्री र औषधि खरिदमा ठूलो अनियमितता भएको छ । खोपको समानुपातिक वितरण हुन सकेको छैन कात्रो किन्नसमेत सेटिङ मिलाएर कमिसनको चक्करमा लागेको देखिन्छ ।”

उनले प्रदेश एक आर्थिक, सामाजिक, भौगोलिक, पर्यटकीय, धार्मिक, जातीय तथा भाषिक हिसावले देशकै एक नम्बरमा आउने सम्भावना बोकेको भएपनि सरकारको कार्यशैलीले सम्भावना कमजोर भएको सुनाए ।

सरकारमा रहेको दलभित्र एक समूहले अर्कोलाई पाखा लगाएर चलखेलमा विकाससँग सम्बन्धित ठेक्कापट्टा दिने गरिएको बताउँदै भने, “मुख्यमन्त्री जनताको सेवकभन्दा पनि शासक बन्न थालेकाले धेरै कार्यक्रम मुख्यमन्त्रीका नाममा ल्याइएको छ । आफू निकटका कार्यकर्ताको भरपोषणमा केन्द्रित हुने गरी आएका कार्यक्रमले जनताको जनजीविकामा फरक परेको छैन ।” उनले प्रदेश सरकारको नीति तथा कार्यक्रम र बजेटसमेत भैँसीलाई एकमुठ्ठी चामल दिएर अघाउन लगाएको जस्तो भएको भन्दै टिप्पणी गरे ।

प्रदेश नम्त्रर १ का भौतिक पूर्वाधार मन्त्री आफ्नो वडामा अल्मलिएको भन्दै कार्कीले मन्त्रीले प्रदेशभित्र अरु जिल्ला र आफ्नै जिल्लामा समेत अन्य स्थानीय तह तथा वडाहरू छन् भन्ने हेक्का नराखेको पाइएको आरोप लगाए ।

उनले भने, “प्रदेशका मन्त्रीहरू आफ्नै वडाहरूमा अल्मलिने हो भने त्यस्ता मन्त्रीले सिङ्गो प्रदेशको नेतृत्व कसरी गर्छन् । विकास र बजेट आफ्नो वडामा खन्याउनेले प्रदेशको वृहत्तर विकासबारे सोच्न सक्लान् ?” कार्कीले वडामात्र सीमित हुने भए वडाको अध्यक्ष भएर बस्न प्रदेशका मन्त्रीलाई सुझाव दिएका छन् ।

अहिलेसम्म प्रदेशको नामाकरण गर्न नसकेको सरकारले प्रदेशका जनताको भावना बुझनु नसक्ने र एमालेभित्रकै आन्तरिक कलहलाई व्यवस्थापन गर्न नसक्दा बहुमतको प्रदेश सरकार केही समयभित्रै समाप्त हुने कार्कीले ठोकुवा गरे ।

काङ्ग्रेस राजनीतिबारे बोल्दै उनले भदौ १९ सम्ममा नेपाली काङ्ग्रेसको १४औँ महाधिवेशन अनिवार्य गर्नु पर्ने भएकोले लोकतन्त्र र पार्टीलाई सशक्त बनाउने नेतृत्वको खोजी भइरहेको बताए ।

प्रतिक्रिया

सम्बन्धित खवर

error: Content is protected !!