विराटनगर, २१ कात्तिक । विराटनगरमा लहरीले अटोलाई ठक्कर दिँदा एकको मृत्यु भएकाे छ भने दुईजना घाइते भएका छन् । विराटनगर–३ दूधफारम नजिक एनएल ०२–एन ४४८७ भारतीय लहरीले अटो टेम्पोलाई ठक्कर दिँदा अन्दाजी ३५–४० वर्षीया एक महिलाको मृत्यु भएकाे हो ।
शुक्रबार दिउँसो भएको दुर्घटनामा एक पुरुष र एक महिला गम्भीर घाइते भएका छन् । मृतकको पहिचान खुलेको छैन । उनको उपचारका क्रममा नोबेल शिक्षण अस्पतालमा मृत्यु भएकाे हो ।
घाइतेमध्ये पुरुष अटोका चालक विराटनगर १३ का ४५ वर्षीय वीरबहादुर श्रेष्ठ हुन् । गम्भीर अवस्थाकी घाइते महिलाको पहिचान खुलेको छैन । दुवै घाइतेको नोबेल शिक्षण अस्पतालमा उपचार भइरहेको छ ।
सुनसरीको दुहवीतिरबाट आउँदै गरेका लहरीले सडक पार गर्दै गरेकाे को २ ह २८१२ नम्बरको अटो टेम्पोलाई ठक्कर दिएको थियो । दुर्घटनाबाट टेम्पोमा पूर्ण रुपमा क्षति पुगेको छ भने लहरी सडकबाट पल्टिएर खेतमा पुगेको छ ।
प्रहरीले लहरीका चालक भारत मजफपुरका २४ वर्षीय देवेन्द्र सहनी र सहचालक २९ वर्षीय मिथुन कुमारलाई नियन्त्रणमा लिएको छ ।
