विराटनगर, २६ कात्तिक । मोरङको विराटनगर महानगरपालिकाबाट तीन लाखभन्दा बढीको भन्सार छली ल्याएको सामान बरामद भएको छ । मंगलबार विराटनगरबाट अन्दाजी तीन लाख १२ हजार ६०० बराबरको भन्सार छली ल्याएको अवैध सामाग्री बरामद भएको हो ।
हिजो बेलुका अन्दाजी १०ः४० बजे विराटनगर– १६ दरैया बस्ने बर्ष अन्दाजी २५ को राहुल रायले भारतको जोगबनीबाट अवैध रूपमा भन्सार छली कपडा तथा लेडिज चुरा बरामद भएको छ ।
बिशेष सूचनाको आधारमा जिल्ला प्रहरी कार्यालय मोरङबाट खटिएको प्रहरी टोलीले उनको घरबाट कपडा तथा लेडिज चुरासमेत गरी अन्दाजी एक लाख ६७ हजार तीन सय बराबरको सामान बरामद गरेको हो ।
सामानसहित रायलाई पक्राउ गरी आवश्यक कारवाहीको लागि मूल भन्सार कार्यालय रानी विराटनगरमा बुझाइएको मोरङ प्रहरीले जनाएको छ ।
यसैगरी मंगलबार साँझ ४६ः३० बजे जिल्ला मोरङ विराटनगर महानगरपालिका–९ स्थित सडक किनारामा अवैध रूपमा भन्सार छली चोरी पैठारी गरी ल्याइ वेवारिसे अवस्थामा राखेको कपडा तथा किराना सामान बरामद भएको छ ।
जिल्ला प्रहरी कार्यालय मोरङबाट खटिएको प्रहरी टोलीले अन्दाजी एक लाख ४५ हजार तीन सय बराबरको सामान फेला पारी बरामद गरिएको र आवश्यक कारवाहीको लागि मूल भन्सार कार्यालय रानी विराटनगरमा बुझाइएको मोरङ प्रहरी प्रवक्ता मानबहादुर राईले जानकारी दिए ।
