सुनसरी ः खेलाडीबाट प्रशिक्षक बन्नु जीवनको एक महत्वपूर्ण ‘टर्निङ पोइन्ट’ रहेको कोशी प्रदेश सरकारका उद्योग, कृषि तथा सहकारी मन्त्री खगेनसिं हाङ्गामले बताए । फुटबल जस्तो विश्वव्यापी खेलमा अग्रस्थानमा पुग्न चाहने हो भने समय सापेक्ष परिवर्तनलाई आत्मसात गर्दै अगाडि बढ्न जरुरी छ । उहाँले भन्नुभयो,
ताप्लेजुङको प्रगतिशील फुटबल क्लबका संस्थापक तथा अध्यक्ष समेत रहेका मन्त्री हाङ्गाम कोशी प्रदेश फुटबल संघद्वारा आयोजित एशियाली फुटबल काउन्सिल (एएफसी ) लाइसेन्स ‘डि’ तहको सामुदायिक फुटबल प्रशिक्षक तालिमको उद्घाटन कार्यक्रममा सम्बोधन गर्दै उनले “फुटबल अब हिजोको जस्तो सजिलो खेल रहेन । समयसँगै खेलको स्वरूप मात्र होइन, प्रतिस्पर्धा र दक्षताको मापदण्ड पनि बदलिएको छ ।”
मन्त्री हाङ्गामले प्रशिक्षार्थीहरूलाई लक्षित गर्दै फुटबल प्रशिक्षक भएर नयाँ पुस्ता तयार पार्नु चुनौतीपूर्ण कार्य भएको उल्लेख गरे । “हिजोको समयमा हामी मोजाको बल बनाएर खाली खुट्टै खेल्थ्यौं । तर अहिलेको पुस्ता आधुनिक जुत्ता र प्रविधिमैत्री बलको पहुँचसम्म पुगेको छ ।”
उनका अनुसार, पहिले हारजितलाई सामान्य मानिन्थ्यो, तर अहिले खेल क्षमता र योग्यताको आधारमा मूल्यांकन हुने क्षेत्र बनिसकेको छ । “समयसँगै बदलिएको यथार्थलाई स्वीकारेर अघि बढ्नुपर्ने आवश्यकता आजको खेल क्षेत्रमा झन् बढेको छ,।”
प्रविधिले ल्याएको परिवर्तनसँगै शिक्षा, खेलका नियमदेखि कला क्षेत्रसम्म सबैमा उल्लेख्य रूपान्तरण आएको उल्लेख गर्दै मन्त्री हाङ्गामले भने , “अहिलेको समयमा शिक्षकले विद्यार्थीको प्रश्नमा ‘भोली पढेर भन्छु’ भन्ने छुट छैन । सबै कुरा पहिले आफैंले पढेर,बुझेर सिकाउनु पर्ने आवश्यकता छ ।
कोशी प्रदेश फुटबल संघका अध्यक्ष किशोर राईले भने “हाम्रो लक्ष्य दश वर्षभित्र विश्वकप फुटबलको प्रतिस्पर्धामा नेपालको सम्मानजनक उपस्थिति सुनिश्चित गर्नु हो ।” त्यो लक्ष्यमा पुग्नका लागि नेपाली फुटबललाई व्यवसायीकरण गर्न सक्नु जरुरी रहेको उनले बताए । उनले भने फुटबलका सबै पक्षहरू,खेलाडी, प्रशिक्षक, रेफ्रीदेखि प्राविधिकहरूसम्मलाई आत्मनिर्भर बनाउने गरी व्यवसायिक ढंगले अघि बढ्न एन्फा क्रियाशील छ ।
एन्फा केन्द्रीय सदस्य दिपेन्द्र धिमालले फुटबल प्रशिक्षक तालिम सफलतापूर्वक सम्पन्न गर्नु सहज प्रक्रिया नभएको बताए । ‘सी’ क्लासको लाइसेन्स परीक्षामा भाषा कमजोरीका कारण आफू असफल भएको स्मरण गर्दै उनले । तपाईंहरूलाई अहिले नेपाली भाषामा तालिम पाउने अवसर मिलेको छ । जुन तपाईंहरूको सौभाग्य हो । पहिलेका तालिमहरू अंग्रेजी भाषामा मात्र हुने र विदेशी प्रशिक्षकबाट प्रशिक्षण दिनुहुँदा भाषा एक मुख्य चुनौती हुने गरेको उनको भनाई छ ।
धरानस्थित एन्फा टेक्निकल सेन्टरमा चार दिनसम्म चल्ने आवासीय प्रशिक्षणमा कोशी प्रदेशका विभिन्न जिल्लाबाट आएका ६० जना प्रशिक्षार्थीको सहभागी रहेको छ । यस( एएफसी) लाइसेन्स ‘डि’ क्लासको प्रशिक्षण सफलतापूर्वक सम्पन्न गरेका प्रशिक्षकहरू एएफसीबाट मान्यता प्राप्त हुनेछन् ।