काठमाडाैँ, २२ माघ । नेपाल कम्युनिष्ट पार्टी (नेकपा) प्रचण्ड-माधव समूहले आव्हान गरेकाे आमहड्तालको विरोधमा फेसबुक ग्रुप मेन्स रूम रिलोडेड (एमआरआर) का युवाहरु चक्रपथ परिक्रमा गरेका छन् । बिहीबार एमआरआरका युवाहरुले मोटरसाइकल र्याली गर्दै चक्रपथ परिक्रमा गरेका हुन् ।
बन्दलाई बन्द गराैँ भन्दै युवाहरुले आम हड्तालको विरोध गरेका हुन् । प्रचण्ड-माधव समूहले आव्हान गरेको देशव्यापी आमहड्तालले जनजीवन प्रभावित भएको छ ।
उपत्यकामा बिहान ९ बजेसम्म करीब २० प्रतिशत मात्र सार्वजनिक यातायातका साधन सञ्चालनमा रहेका थिए । केन्द्रीय प्रहरी प्रवक्ता वसन्तबहादुर कुँवरका अनुसार सवारी साधन अवरोध गर्न खोज्न करिब ८० जना पक्राउ परेका छन् ।
राजधानी बाहिर हेटौंडा, नारायणगढ, विराटनगरलगायतका क्षेत्रमा सञ्चालित सवारी साधन तथा ट्रकमा ढुङ्गा प्रहार भएको र बिहान काठमाडौंको समाखुशीमा ट्याक्सीमा आगजनी भएको थियो ।
उपत्यकामा माइक्रोबस लगायतका सार्वजनिक सवारी साधनमा प्रहरी खटाइ सुरक्षा दिइएको र केही सार्वजनिक यातायात सञ्चालनमा रहेका छन् । संवैधानिक निकायमा भएको नियुक्ति लगायतका विषयलाई लिएर सो समूहले आज देशभर आमहड्तालको घोषणा गरेको थियो ।
