पाँचथर, २ चैत्र: जिल्लामा ‘पूर्ण खोप सुनिश्चितता तथा दिगोपना’ सम्बन्धी कार्यक्रम सम्पन्न भएको छ। स्थानीय स्रोतको उपयोग, स्वामित्व र सहभागितामा आधारित खोप सुनिश्चितता अभियानलाई प्रभावकारी बनाउने उद्देश्यले कार्यक्रम आयोजना गरिएको हो।

कार्यक्रममा कोशी प्रदेश सरकारका स्वास्थ्य मन्त्री मानवहादुर लिम्बूले बालबालिकाको स्वास्थ्य सुरक्षा र रोगको रोकथामका लागि खोप कार्यक्रम अत्यन्तै प्रभावकारी उपाय भएको बताए। उनले पूर्ण खोप सुनिश्चित गर्न सबै तहका सरकार, स्वास्थ्यकर्मी तथा समुदायको सक्रिय सहभागिता आवश्यक रहेको उल्लेख गरे।

विश्व स्वास्थ्य संगठन का अनुसार खोपका कारण प्रत्येक वर्ष विश्वभर लाखौँ बालबालिकाको जीवन जोगिने गरेको छ। नेपालले पनि राष्ट्रिय खोप कार्यक्रममार्फत बालस्वास्थ्य सुधारमा उल्लेखनीय उपलब्धि हासिल गरेको बताइएको छ।

राष्ट्रिय खोप कार्यक्रम अन्तर्गत नेपालमा बालबालिकालाई १४ प्रकारका रोगविरुद्ध खोप उपलब्ध गराइँदै आएको छ। BCG, OPV, IPV, पेन्टाभ्यालेन्ट, PCV, रोटाभाइरस, दादुरा–रुबेला तथा JE लगायतका खोप नियमित रूपमा प्रदान गरिँदै आएको स्वास्थ्यकर्मीहरूले जानकारी दिएका छन्। यी खोपहरूले क्षयरोग, पोलियो, डिप्थेरिया, टिटानस, हेपाटाइटिस–बी, निमोनिया र दादुरा जस्ता गम्भीर रोगबाट सुरक्षा प्रदान गर्ने विश्वास गरिएको छ।

नेपाल जनसांख्यिक तथा स्वास्थ्य सर्वेक्षण (NDHS) २०२२ अनुसार देशका करिब ८० प्रतिशत बालबालिकाले १२ महिनाभित्र सबै आधारभूत खोप प्राप्त गरेका छन्। तर अझै केही बालबालिका पूर्ण खोपबाट वञ्चित रहेकाले छुटेका बालबालिकाको पहिचान र नियमित अनुगमन आवश्यक रहेको कार्यक्रममा औँल्याइएको थियो।

नेपालले सन् २०१४ मा मातृ तथा नवजात टिटानस उन्मूलन, सन् २०२० मा दादुरा–रुबेला नियन्त्रणतर्फ उल्लेखनीय प्रगति तथा २०१४ देखि पोलियोमुक्त देशको अवस्था कायम राख्न सफल भएको जानकारी पनि दिइयो।

कार्यक्रममा खोप सेवाको पहुँच र गुणस्तर सुधार, कोल्ड चेन व्यवस्थापन सुदृढीकरण, स्वास्थ्यकर्मीको क्षमता अभिवृद्धि तथा खोपसम्बन्धी भ्रम र हिचकिचाहट हटाउन समुदायस्तरमा जनचेतना बढाउनुपर्नेमा जोड दिइएको थियो।